www.vwinslow.com
ஆண்டவர் உன் இருதயத்தின் வேண்டுதல்களை உனக்கு அருள் செய்வார்( சங் 37:4)

தமிழ் கத்தோலிக்க இணையம்

Click here to edit subtitle

News / Articles

view:  full / summary

Coronavirus: Lourdes shrine closes temporarily

Posted on March 18, 2020 at 4:15 AM

கோவிட்-19ஆல் லூர்து அன்னை திருத்தலம் மூடப்படுகிறது

லூர்து அன்னை திருத்தலம் அதன் வரலாற்றில் முதன்முறையாக மூடப்படுகின்றது. மேலும், லூர்து நகரில் அன்னை மரியா காட்சியளித்த இடத்தில் அமைக்கப்பட்டுள்ள கெபியில் அருள்பணியாளர்கள் தனியாகத் திருப்பலி நிறைவேற்றுவார்கள். அதனை நேரடி ஒளிபரப்பில் காணலாம்

 

கொரோனா தொற்றுக் கிருமியின் கடுமையான அச்சுறுத்தல் காரணமாக, பிரான்ஸ் நாட்டு லூர்து அன்னை திருத்தலம், வரலாற்றில் முதன்முறையாக மூடப்படுகின்றது என்று அறிவிக்கப்பட்டுள்ளது.

 

ஐரோப்பாவில் இத்தொற்றுக்கிருமி வேகமாகப் பரவி வருவதைத் தடைசெய்யும் நோக்கத்தில், லூர்து அன்னைத் திருத்தலத்திலுள்ள குணமளிக்கும் குளம் மூடப்பட்டிருந்த நிலையில், தற்போது அத்திருத்தலம், ஒரு குறிப்பிட்ட காலத்திற்கு மூடப்படுவதாக மார்ச் 17, இச்செவ்வாயன்று அறிவிக்கப்பட்டுள்ளது.

 

பிரான்ஸ் நாட்டு அரசுத்தலைவர் இம்மானுவேல் மக்ரோன் (Emmanuel Macron) அவர்கள் மேற்கொண்டுள்ள நடவடிக்கைக்கு ஒத்திணங்கும் முறையில், இத்திருத்தலமும் மூடப்படுவதாக, அத்திருத்தல அதிபர் அருள்பணி Olivier Ribadeau Dumas அவர்கள் அறிவித்துள்ளார்.

 

அருள்பணி Dumas அவர்கள் வெளியிட்டுள்ள டுவிட்டர் செய்தியில், “இத்திருத்தல வரலாற்றில் முதன்முறையாக இது மூடப்படுகின்றது. மேலும், இத்திருத்தல இணையதளப் பக்கத்தின் வழியாகச் செபியுங்கள்” என்ற சொற்கள் இடம்பெற்றுள்ளன.


Source: வத்திக்கான் செய்திகள்

Obituary Notice - Rev.Fr. Arulnathan OMI

Posted on March 17, 2020 at 3:55 AM

அருட்த்தந்தை அருள்நாதன் (அமதி அவர்கள் இறைபதம் அடைந்தார். இவர் ஏழை மக்கள் மீதும் இளைய தலைமுறை

மற்றும் இளம் குருக்கள் மீதும் மிகுந்த பாசம் கொண்ட துறவி. இவருடைய ஆத்மா இறைவனில் இளைப்பாற

இறைவனை பிரார்த்திக்கின்றோம்.

Bad and sorrowful message. Rev.Fr. Arulnathan OMI has passed away. May his soul rest in peace. Amen.


அருட்தந்தை. அருள்நாதன் அமதி

********************************************

யாழ்ப்பாணம், நாரந்தனை புனித. பேதுரு பவுலானவர் ஆலயத்தைச் சேர்ந்த அருட்தந்தை அவர்கள், 1948ம் ஆண்டு பங்குனி மாதம் 18ம் திகதி பேதுரு மரியா தம்பதியினரின் இரண்டாவது பிள்ளையாக பிறந்தார். இவர் தனது ஆரம்பக்கல்வியை யாழ்ப்பாணம் சரவணை றோமன் கத்தோலிக்க தமிழ் கலவன் பாடசாலையிலும், இடைநிலைக் கல்வியை யாழ், வேலணை மத்திய மகா வித்தியாலயத்திலும், உயர் கல்வியை யாழ் ஊர்காவற்துறை புனித அந்தோனியார் கல்லுரியிலும் கற்றுத் தேர்ந்தார்.

 

ஆண்டவரின் குரலுக்கு செவிமடுத்து 1970ம் ஆண்டு நுகேகொடவில் உள்ள அமலமரித் தியாகிகளின் சிறிய குருமடத்தில் குருமாணவனாக இணைந்து அரம்பபயிற்சியை முடித்துக்கொண்டு பண்டாரவளையிலுள்ள அ.ம.திகளின் நவசந்நியாச மடத்திலே 1977ம் ஆண்டு தனது முதல் துறவற அர்ப்பணத்தை மெற்கொண்டார். பின் அம்பிட்டியாவிலுள்ள தேசிய குருமடத்தில் தனது மெய்யியல், இறையியல் கற்கை நெறிகளை பூர்த்தி செய்து 1980ம் ஆண்டு ஆவணி 29ம் திகதி ஆயர் தியோகுப்பிள்ளை ஆண்டகை அவர்களினால் யாழ். மரியன்னை பேராலயத்தில் குருவாக திருநிலைப்படுத்தப்பட்டார்.

 

தனது முதல் பணித்தளமாக சுண்ணாகத்தில் உதவிப்பங்குத்தந்தையாக தன் ஆன்மீக மேய்புப் பணியை தொடங்கிய அருட்தந்தை அவர்கள் தொடர்ந்து முல்லைத்தீவு, வலைப்பாடு போன்ற பிரதேசங்களில் உதவிப் பங்குததந்தையாக தன் பணியை செவ்வனே செய்து தனது அழைப்புக்கு பிரமாணிக்கமாய் வாழ்ந்த இவர் பங்குத் தளங்களில் இறைமக்கள்பால் அன்பும் கரிசனையும் கொண்டு அவர்களை ஆன்மீக காரியங்களில் ஊக்குவிக்கும் ஓர் குருவாக திகழ்ந்தார். இதனால் ஒன்றன் பின் ஒன்றாக மன்னார் மற்றும் யாழ் மறைமாவட்டங்களில் தனது பங்குப்பணியை தொடர்ந்த தந்தை அவர்கள் 1982ம் ஆண்டு முதல் 2011ம் ஆண்டுவரை ஓமந்தை, வங்காலை, தலைமன்னார், வவுனியா சிதம்பரபுரம், விடத்தல் தீவு, தேவன்பிட்டி, இலுப்பைக்குளம் ஆகிய பங்குகளில் பங்குத்தந்தையாகவும், ஆன்மீக வழிகாட்டியாகவும், மக்களை கட்டுப்பாட்டுடன் வழிநடாத்தினார்.

 

பின் 2011ம் அண்டு முதல் 2012 வரை பம்பைமடுவில் உள்ள புனித அன்னைதெராசா மடத்தில் ஆன்ம குருவாக பணிபுரிந்து ஈற்றிலே அமல உற்பவத்திலே அமதிகளின் தோழமையில் மகிழ்ச்சியாக கழித்து 16.03.2020 அன்று இறைபதம் எய்தினார்.

 

அருட்தந்தை வாழ்நாள் முழுவதும் செபத்தை தன் மேல்வரிச்சட்டமாக கொண்டு அன்னை மரியிடமும், திருச்சசெபமாலை பக்தியிலும் அசையா விசுவாசம் கொண்டவராய், அதனை மற்றவர் மனங்களில் பதிக்கச்செய்யும் ஆன்மீக சிற்பியுமாய் வாழ்ந்தார் என்றால் அது மறுக்க முடியாது. இளையோர் மட்டில் அதிக ஈடுபாடு கொண்டவராய் வாழ்ந்த தந்தை அவர்கள் அவர்களை கல்வியிலும், ஒழுக்கத்திலும், ஆன்மீக நெறியிலும் கட்டுப்பாட்டுடன் வளர்க்கும் நல் ஆசானாய் திகழ்ந்திருந்தார். சிறந்த பாடகராகவும் பக்தியுணர்வோடு வழிபாடுகளை செய்வதில் இவருக்கு நிகர் இவரே. பல குரு மாணவர்களை உருவாக்கித் திருச்சபைக்கு அளித்துள்ளார். சமூகத்திற்கு நல்ல தலைவர்களை உருவாக்கியுள்ளார். ஏழை மாணவர்களுக்கு கல்வியில் முன்னேற உதவியுள்ளார்.

 

அதுமட்டுமல்லாது நவீன தொலைத்தொடர்பு சாதன வழி நற்செய்தி பறைசாற்றுவதில் மும்முரமாகச் செயற்பட்டு பலரை தன் முது வயதிலும் நன்நெறிப் படுத்துவதில் நோக்கம் கொண்டார் இந்த மறை பணியாளர். இத்தகை பல திறமைகளை தன்னகத்தே கொண்ட அருட்தந்தை அருள்நாதன் தன் துறவற அர்ப்பண வாழ்வில் அசைக்க முடியாத பிரமாணிக்கமும், ஆடம்பரமற்ற எளிமையான வாழ்க்கையும், ஆன்மீக தோழமை வாழ்விற்கு முக்கியத்துவம் கொடுத்து வாழ்ந்து எம் யாவருக்கும் பல முன்மாதிரிகையான வாழ்க்கைத் தடங்களை விட்டுச் சென்றுள்ளார். இவரை அமலமரித் தியாகிகள் வழி திரு அவைக்கு கொடையாகத் தந்த இறைவனுக்கு நன்றி கூறுவதுடன்இவரின் ஆன்ம இளைப்பாற்றிக்காக மன்றாடுவோம்.



Building up St.Anthony's Church, Kilinochchi

Posted on March 15, 2020 at 1:50 PM

கிளிநொச்சியில், A9 வீதியில்(55ஆம் கட்டை) அமைந்துள்ள கோடி அற்புதராம் புனித அந்தோனியார் ஆலயத்தின் கட்டிட நிர்மாணப்பணி பங்குத்தந்தையின் முயற்சியினாலும் பங்குமக்களின் அயராத உழைப்பினாலும் முன்னெடுக்கப்பட்டுவருகின்றது.

What is Lent season?

Posted on February 26, 2020 at 4:25 AM

தவக்காலம்

 

தவக்காலம் - கடவுளின் அருள்தரும் காலம்; தவக்காலம் - கடவுளுடன் உறவைப் புதுப்பித்தல் காலம்

 

விபூதிப்புதன் உடன் இவ்வாண்டுக்கான தவக்காலம் கிறீஸ்தவர்களுக்கு குறிப்பாக கத்தோலிக்கர்களுக்கு ஆரம்பமாகின்றது. "நீ மண்ணாய் இருக்கிறாய். நீ மண்ணுக்கே திரும்புவாய்" என்னும் தொடக்க நூல் வசனத்தை கூறி மனிதனின் பூரணத்துவத்தை குறிக்கும் இடமென்னும் நெற்றியில் சாம்பல் கொண்டு சிலுவை அடையாளத்தை வரைந்து இறையாசி வழங்கும் விபூதிப்புதன் (சாம்பல் புதன் ) வழிபாடுகளுடன் தவக்காலம் தொடங்கப்பெற்றுவிடும்.

கத்தோலிக்க மரபில் தவக்காலம் என்றால் என்ன ?

 

கத்தோலிக்க மரபில் தோன்றி கிறீஸ்தவர்களின் பெரும்பாலானவர்களுக்குப் பொதுவாக உள்ள தவக்காலம் என்றால் என்ன ? விபூதிப்புதன் முதல் உயிர்த்தஞாயிறு வரையிலான 46 நாட்கள் (ஆறு ஞாயிறுகள் நீங்கலாக) செபம் , தவம் , தவிர்ப்பு , பிராயச்சித்தம் செய்தல் என்பனவற்றுக்கான நாட்களாக உலகெங்கும் உள்ள கிறீஸ்தவர்களால் முன்னெடுக்கப்படும். இயேசு பெருமான் தன்பொதுப்பணியினை தொடங்கும்முன்னர் நாற்பது நாட்கள் பாலைவனத்தில் தவமியற்றியதையும், அலகையினால் சோதிக்கப்பட்டு அதனை அகன்று போகுமாறு பணித்ததையும் நினைவு கூறும் நிகழ்வாக இந்த 40 நாட்கள் தவக்காலமாக பின்பற்றப்படுகிறது. கடவுளை சார்பதற்கான உளமாற்றத்துக்கும் எவ்வுயிர்க்கும் தீங்கு செய்யாது வாழ்வதற்கான ஐம்புலக்கட்டுப்பாட்டிற்குமான ஒரு காலமாக இக்காலம் கருதப்படுகின்றது. இவ்வாறு உள்ளமும் உடலும் கடவுளுடன் ஒன்றித்து வாழ்வதற்காக இறைத்துணை வேண்டிச் செபித்தல், தவம் செய்தல், தேவையற்ற நுகர்வுத் தவிர்ப்புக்களைச் செய்தல், உள்ளதைப் பகிர்தல் என்பன தவக்காலத்தின் நோக்காக அமையும். செபம் , தவம் , தானம் என்று சுருக்கமாகத் தவக்கால நோக்கினை கூறலாம். இயேசு பெருமான் தனது மக்கள் பணிகளைத் தொடங்குவதற்கு முன்னர் 40 நாட்கள் வனாந்தரத்தில் தவமியற்றிய முன்னுதாரணத்தைப் பின்பற்றியே 40 நாட்கள் தவக்காலம் என்கின்ற கால அமைவு ஏற்படுத்தப்பட்டது என்பர்.

 

தவம் - இறைவனுக்காகவும் மானிடத்துக்காகவும் பணி செய்தலுக்கான அடித்தளமாகவும் அருட்தளமாகவும் உள்ளது என்பதை வலியுறுத்துவதால் கிறீஸ்தவர்களுக்கும் 40 நாள் தவக்காலம் இவ்வுலக வாழ்வுக்கும் அவ்வுலக வாழ்வுக்கும் இன்றியமையாதனவாகின்றன.

 

செபம் செய்வோம்! தவம் செய்வோம்!! தான தர்மம் செய்வோம்!!!

மனம் மாறுவோம்! மனம் மாறுவோம்!! மனம் மாறுவோம்!!!

Basilica of St. Mary major in Rome

Posted on February 8, 2020 at 2:25 AM

அன்னை மரியா திருத்தலங்கள் – உரோம் புனித மேரி மேஜர் பசிலிக்கா


மழலைப் பருவம் முதல் மண்ணிலிருந்து மறையும் இறுதிக்கட்டம் வரை அனைத்து மனிதர்கள் நாவில் நர்த்தனம் புரியும் அழகான சொல் அம்மா. அம்மா என்ற சொல்லுக்கு இணையான வேறு சொல் இவ்வுலக மொழிகளில் கிடையாது. தள்ளாத வயதிலும்கூட தனது அம்மாவை நினைத்துப் பார்க்கும் அளவுக்கு, அம்மா என்றாலே அனைவருக்கும் அதிகம் பிடிக்கும். அதனைல்தான் அம்மா என்று அழைக்காத உயிரில்லையே!.. அம்மாவை வணங்காமல் உயர்வில்லையே!..நேரில் வந்து பேசும் தெய்வம் பெற்றதாயன்றி வேறொன்று ஏது? என்ற கவிஞர் வாலியின் வரிகள் அவ்வளவு பிரபலமடைந்துள்ளன. ஆண்டவர் இயேசுவின் அன்னையான மரியா, ஒரு வரலாற்று மனிதர். ஒரு காவிய நாயகி. இயேசு எனும் மகா காவியத்தை ஈன்றெடுத்தார் என்பதால் அவரும் காவியமாகவேத் திகழ்கிறார். கத்தோலிக்கத் திருமறையின் இரண்டாயிரத்துக்கு மேற்பட்ட வரலாற்றில் அன்னைமரியா ஏற்படுத்திய தாக்கங்கள் எண்ணற்றவை. கத்தோலிக்கக் கிறிஸ்தவர்களின் வாழ்விலும் வார்த்தையிலும், அம்மா, மரியே, தாயே என்ற சொற்கள் அமுதமாய், தேனாய், மதுரகானமாய் அன்றாடம் ஒலித்துக் கொண்டேதான் இருக்கின்றன. இறைவனின் தாயாம் அன்னை மரியாவைக் கத்தோலிக்கக் கிறிஸ்தவர்கள் கொண்டாடும்போது பிற கிறிஸ்தவ சபையினரும், பிறமதத்தவரும்கூட அந்தத் தாயைப் போற்றுகின்றனர். இதற்கு உலகெங்கிலும் இருக்கின்ற அன்னைமரியா திருத்தலங்களே சான்று.

தமிழகத்தின் வேளாங்கண்ணி, இலங்கையின் மடு, பிரான்சின் லூர்து, சலேத், போர்த்துக்கல்லின் பாத்திமா, மெக்சிகோவின் குவாதாலூப்பே, இத்தாலியின் லொரேத்தோ, உரோம் நகரின் திவினோ அமோரே, போஸ்னியாவின் மெச்சுக்கோரே, போலந்தின் செஸ்டகோவா இப்படி அன்னைமரியா திருத்தலங்களுக்கு ஒருமுறை சென்று வந்தாலே போதும், அங்கு வரும் பக்தர்கள் யார் என்பதை புரிந்து கொள்ளலாம். நோய்கள் நீங்கி நலம்பெற, தேவைகள் நிறைவுபெற, கவலைகள் தீர, குழப்பங்கள் மறைய, ஆன்ம நலம் பெற, சண்டைசச்சரவுகள் நீங்கி அமைதி பெற என அம்மா என அன்பொழுக அழைத்து அந்த அம்மாவின் அருளாசீரைப் பெற்றுச் செல்லும் மனிதர்கள் ஏராளம் ஏராளம். நிறம், இனம், மதம், மொழி, நாடு என்ற வேற்றுமை பாராது மக்கள் அன்னைமரியாவை நாடிச் சென்று மனநிறைவு பெற்றுச் செல்கின்றனர். இந்த அன்னையும் தனது பிள்ளைகளைத் தான் குடிகொண்டிருக்கும் திருத்தலங்களுக்குக் காந்தமாய்க் கவிர்ந்திழுக்கிறார். இலட்சக்கணக்கான அன்னைமரியா பக்தர்கள் இந்த 2013ம் ஆண்டுப் புத்தாண்டை வேளாங்கண்ணியில் தொடங்க விரும்பி அங்குச் சென்றுள்ளனர். இந்த அனைனை விசுவாசத்தின் தாய். இறைவனது வார்த்தையை நம்பியதால் பேறுபெற்றவர் எனப் போற்றப்பட்டவர். இறைவனால் ஆகாதது எதுவுமே இல்லை என்பதை முழுமையாக நம்பியவர். எனவே இந்தப் புதிய 2013ம் ஆண்டில், இந்த விசுவாசத்தின் ஆண்டில், இந்த நம்பிக்கை ஆண்டில் உலகின் அன்னைமரியா திருத்தலங்களுக்கு நாமும் இந்த தொடர் நிகழ்ச்சியின் மூலமாக ஓர் ஆன்மீகப் பயணம் செல்வோம். இந்த அன்னைமரியாவின் விசுவாச வாழ்வை நாமும் பின்தொடருவோம். இந்தப் பயணத்தில் முதலில், அன்னைமரியா திருத்தலங்களுக்கு எல்லாம் தலைமையாய் விளங்கும் உரோம் புனித மேரி மேஜர் பசிலிக்காவுக்கு முதலில் செல்வோம்.

மேரி மேஜர் என்ற பெயரிலேயே இந்தப் பசிலிக்காவினுடைய பெருமைகள் தெரியவரும். இது உரோமையிலுள்ள நான்கு தொன்மைமிக்க பசிலிக்காக்களில் ஒன்று. உரோம் எஸ்குலின் குன்றின்மீது அமைந்துள்ள இந்தப் பசிலிக்கா, நான்காம் நூற்றாண்டில் கட்டப்பட்டது. இதன் மணிக்கூண்டு உரோமிலுள்ள இதர மணிக்கூண்டுகளில் அதிக உயரமானதாகும். துருக்கி நாட்டிலுள்ள எபேசு நகரில் கி.பி.431ம் ஆண்டில் கூடிய பொதுச் சங்கம், புனித கன்னிமரியை, இறைவனின் தாயாக அதிகாரப்பூர்வமாக அறிக்கையிட்டது. “Theotokos” அதாவது மரியா, இறைவனின் தாய் என்று அறிவிக்கப்பட்ட பின்னர் புனித கன்னிமரியா பக்தியும் பரவலாகப் பரவியது. இதனால் உரோமைப் பேரரசில் மரியாவுக்கென பல இடங்களில் ஆலயங்கள் எழுப்பப்பட்டன. திருத்தந்தை 3ம் சிக்ஸ்துசும்(கி.பி.432-440), புனித கன்னிமரிக்கென எஸ்குலின் குன்றின்மீது ஆலயம் கட்ட விரும்பினார். ஆயினும், இதற்கு முன்னதாகவே இந்த இடத்தில் மரியாவுக்கென முதலில் ஆலயம் கட்டப்பட்டதாக 13ம் நூற்றாண்டில் பர்த்தோலோமே தெ த்ரெந்தோ என்ற துறவி கூறியிருக்கிறார்.

குழந்தைப்பேறு இல்லாத பக்தியுள்ள ஜொவான்னி பத்ரிசியோவும் அவரது மனைவியும் தங்களது சொத்துக்களையும் பொருள்களையும் திருஅவைக்கு நன்கொடையாக அளிக்கத் திட்டமிட்டனர். கி.பி.358ம் ஆண்டு ஆகஸ்ட் 4ம் தேதிக்கும் 5ம் தேதிக்கும் இடைப்பட்ட இரவில் புனித கன்னிமரியா ஜொவான்னிக்கும், திருத்தந்தை லிபேரியோவுக்கும் கனவில் தோன்றி அன்றிரவு பனி பெய்ந்திருந்த இடத்தில் தனக்கென ஆலயம் எழுப்புமாறு கேட்டுக்கொண்டார். ஏனெனில் ஆகஸ்ட் உரோமைக்கு கடுமையான கோடைகாலம். அக்காலத்தில் பனி பெய்வது நினைத்துப் பார்க்க முடியாதது. ஆயினும் அன்று காலையில் அவ்விடம் சென்று இவ்விருவரும் பார்த்தபோது பனி பெய்ந்திருந்த்து. எனவே அந்த இடத்தில் மரியாவுக்கென முதல் ஆலயம் எழுப்பப்பட்டதாக த்ரெந்தோ துறவி சொல்லியிருக்கிறார். எனவே இந்த ஆலயம் பனிமய மாதா ஆலயம் என்றும் சொல்லப்படுகிறது. இந்த ஆலயம் பல ஆண்டுகள் உள்ளும் புறமும் சீரமைக்கப்பட்டுத் தற்போதைய பசிலிக்காவாகக் கம்பீரமாய்க் கவினுறக் காட்சி அளிக்கிறது. இந்தப் புனித மேரி மேஜர் பசிலிக்கா, அக்காலத்தைப் போன்று இக்காலத்திலும் மக்கள் விரும்பிச் செல்லும் புனித இடமாக இருக்கின்றது. ஆண்டின் 365 நாள்களும் திருப்பயணிகள் கூட்டம் கூட்டமாக இந்தப் பசிலிக்கா சென்று செபிப்பதைக் காண முடிகின்றது. இங்கு ஒரு பீடத்திலுள்ள சகாய மாதா படம், நற்செய்தியாளர் புனித லூக்கா வரைந்த படமெனவும் சொல்லப்படுகிறது. இறைவனின் தாயான மரியாவுக்கு அர்ப்பணிக்கப்பட்ட முதலும், மிகப் பெரியதும், மிக நீளமானதும், மிக முக்கியமான ஆலயமுமாக மேரி மேஜர் பசிலிக்கா அமைந்திருக்கின்றது. இந்தப் பசிலிக்காவின் உட்புறக்கூரை மரத்தாலானது. 15ம் நூற்றாண்டைச் சேர்ந்த இக்கூரை, காஸ்தில்லா அரசி எலிசபெத் வழங்கிய தங்கத்தினால் அழகுபடுத்தப்பட்டது எனவும் வரலாறு கூறுகிறது.

மேலும், இங்கு தலைமைப் பலிபீடத்துக்குக் கீழ் இயேசு பிறந்த மாட்டுத்தொட்டிலின் சில மரத்துண்டுகள் வைக்கப்பட்டுள்ளன. எனவே இந்தப் பசிலிக்கா, மாட்டுத்தொட்டிலின் புனித மரியா என்றே முன்னர் அழைக்கப்பட்டது. 1854ம் ஆண்டு டிசம்பர் 8ம் தேதி மரியா, பாவமின்றி பிறந்தார் என அறிக்கையிட்ட திருத்தந்தை 9ம் பத்திநாதர், இந்தச் சிறு புனித மரக்கட்டைகள் வைக்கப்பட்டிருக்கும் இந்த இடத்தைப் புதுப்பிக்குமாறு கட்டளையிட்டார். இந்தப் புனித மரக்கட்டைகள் 642ம் ஆண்டில் திருத்தந்தை முதலாம் தெயோதோர் காலத்தில் உரோமைக்குக் கொண்டுவரப்பட்டது. பளிங்கு கற்களால் அழகாகக் காட்சியளிக்கும் இந்த இடமும் மொத்த பசிலிக்காவும் பக்தர்களைக் கவர்ந்திழுத்துக் கொண்டிருக்கின்றன. அன்னைமரியாவின் சிறப்பை அறிவித்துக் கொண்டிருக்கின்றன.

 

Basilica of Loreto in Rome

Posted on February 8, 2020 at 2:25 AM

அன்னைமரியா திருத்தலங்கள் – இத்தாலியின் லொரேத்தோ திருத்தலம்


இயேசுவின் தாய் புனித கன்னி மரியா பல பெயர்களால் அழைக்கப்படுகிறார். அந்த இறையன்னை உலகில் எங்கெல்லாம் காட்சி கொடுத்தாரோ, அற்புதங்கள் செய்தாரோ அங்கெல்லாம், அந்தந்த இடங்களின் பெயராலே அவர் அழைக்கப்படுகிறார். வேளாங்கண்ணி மாதா, வாடிப்பட்டி மாதா, லூர்து மாதா, பாத்திமா மாதா, சலேத் மாதா, லொரேத் மாதா என பல பெயர்களில் அழைக்கப்படுகிறார். இந்தியாவுக்கு, ஏன் ஆசிய நாடுகளுக்கு ஒரு வேளாங்கண்ணி போன்று, இத்தாலிக்கு ஒரு லொரேத்தோ என்று சொல்வது மிகவும் பொருத்தமாக இருக்கும். வேளாங்கண்ணியில் கோவில் கொண்டிருக்கும் கடலலைத் தாலாட்டும் ஆரோக்ய அன்னை திருத்தலத்துக்கு இனம், மதம், மொழி, நாடு என்ற பாகுபாடின்றி ஆண்டுதோறும் பல்லாயிரக்கணக்கான பக்தர்கள் செல்வது போன்று, இத்தாலியில் குடிகொண்டிருக்கும் லொரேத்தோ அன்னைமரித் திருத்தலத்துக்கும் இனம், மதம், மொழி, நாடு என்ற பாகுபாடின்றி ஆண்டுதோறும் ஆயிரக்கணக்கான பக்தர்கள் செல்கின்றனர். ஆண்டுதோறும் ஏறக்குறைய நாற்பது இலட்சம் திருப்பயணிகள் லொரேத்தோ அன்னைமரித் திருத்தலம் செல்கின்றனர் என்று ஒரு கணக்கெடுப்பு கூறுகிறது. தாயை நாடி பிள்ளைகள் செல்வது இயல்பு. இயேசுவின் தாயாம் அன்னைமரியா பல்வேறு பெயர்களில் உலகெங்கும் போற்றப்பட்டு வருகிறார். தன்னை அண்டிவரும் கோடிக்கணக்கான பிள்ளைகளுக்கு அற்புதங்களையும் ஆற்றி வருகிறார். லொரேத்தோ அன்னைமரித் திருத்தலத்துக்கு ஒரு முக்கிய சிறப்பு உள்ளதாகப் பாரம்பரியமாகச் சொல்லப்பட்டு வருகிறது.

இத்தாலியின் மத்திய பகுதியிலுள்ள மார்க்கே மாநிலத்தில் முசோனே ஆற்றின் வலது கரையில் அட்ரியாடிக் கடலுக்கு ஏறத்தாழ மூன்று கிலோ மீட்டர் தூரத்தில் அமைந்துள்ள சிறிய நகரம் லொரேத்தோ. 11 ஆயிரம் மக்கள் வாழும் இந்நகரம், உரோமைக்கு வடகிழக்கில் ஏறக்குறைய 175 மைல்கள் தூரத்தில் உள்ளது. இந்நகரம், உலகம் முழுவதும் புகழ்பெற்று விளங்குவதற்கு ஒரே காரணம் அங்கு அமைந்துள்ள அன்னைமரியாத் திருத்தலமே. அதிலும், இத்திருத்தலத்துக்கு மத்தியில் அமைந்துள்ள ஒரு சிற்றாலயம்தான் இப்புகழுக்குக் காரணம். இதை ஆலயம் என்று சொல்வதைவிட வீடு என்றுதான் சொல்ல வேண்டும். ஏனெனில் எருசலேமுக்கு அருகிலுள்ள நாசரேத்தின் புனித வீடுதான் இந்தச் சிற்றாலயம் என்று நம்பப்படுகின்றது. இந்த வீட்டில்தான் புனித கன்னிமரியாவுக்கு இயேசு பிறப்பு குறித்த மங்களச் செய்தியை வானதூதர் கபிரியேல் சொன்னார். நாசரேத்தில் திருக்குடும்பம் வாழ்ந்த இந்த எளிமையான வீடு செங்கற்களாலானது. இந்த வீடுதான் இத்தாலியின் லொரேத்தோ நகரிலுள்ள அழகான, பெரிய பசிலிக்காவுக்கு மத்தியில் அமைந்துள்ளது. இயேசுவின் இவ்வுலக வாழ்வுக்குப் பின்னர் மூன்று நூற்றாண்டுகள் கழித்து புதிதாகக் கிறிஸ்தவத்தைத் தழுவிய உரோமைப் பேரரசர் கான்ஸ்ட்டைன், இந்த எளிமையான வீட்டை நடுவில் வைத்து லொரேத்தோ அன்னைமரித் திருத்தலத்தைக் கட்டினார் என்பது வரலாறு. 1921ம் ஆண்டில் இந்தப் புனித வீட்டில் தீப்பற்றியதால் முதன்முதலில் வைக்கப்பட்ட அன்னைமரியா திருஉருவம் அழிக்கப்பட்டுவிட்டது. இப்போது இங்கு வைக்கப்பட்டுள்ள சிறிய கறுப்பு நிற அன்னைமரியா திருஉருவம் லெபனன் நாட்டு கேதார் மரத்தால் செய்யப்பட்டது. விலையுயர்ந்த ஆபரணங்களாலும் அழகுபடுத்தப்பட்டுள்ளது.

லொரேத்தோவிலுள்ள இந்த நாசரேத் புனித வீடு குறித்து கத்தோலிக்க மரபில் ஒரு புதுமை சொல்லப்படுகின்றது. இந்த வீடு நாசரேத்தில் சிலுவைப்போர் காலத்தில் அழிக்கப்படும் ஆபத்தை எதிர்நோக்கியது. எனவே 1291ம் ஆண்டில் வானதூதர்கள் இதனை தற்போதைய குரோவேஷிய நாட்டில் புதுமையாகக் கொண்டுவந்து வைத்தனர். ஏனெனில் அச்சமயத்தில் நாசரேத்தில் இவ்வீடு இருந்த இடம் திடீரெனக் காலியாக இருந்தது. அதேசமயம் அவ்வீடு குரோவேஷியாவில் காணப்பட்டது. பின்னர் அல்பேனிய முஸ்லீம்களின் ஆக்ரமிப்பினால் இவ்வீடு மீண்டும் தூதர்களால் 1294ம் ஆண்டு டிசம்பர் 10ம் தேதி இத்தாலியின் Recantiக்கு எடுத்துவரப்பட்டது. பின்னர் சிறிது காலம் கழித்து தற்போது இந்த வீடு அமைந்திருக்கும் லொரேத்தோவுக்கு எடுத்துவரப்பட்டது. இந்தப் புனித வீட்டை பல திருத்தந்தையர்கள், புனிதர்கள் உட்பட சிறிய பெரிய அளவில் பலரும் வணங்கி வருகின்றனர். பல புதுமைகளும் இடம்பெற்று வருகின்றன. இந்த வீடு நாசரேத்தில் காணப்பட்ட வீட்டைப் போன்ற பொருள்களைக் கொண்டிருப்பதாக அறிவியலாளர்கள் உறுதி செய்துள்ளனர். இந்தப் புனித வீடு குறித்து மேலும் சில கூற்றுக்களும் சொல்லப்படுகின்றன.

புனித பூமியிலிருந்து கிறிஸ்தவ சிலுவைப் போர் வீரர்கள் முழுவதுமாக வெளியேற்றப்படுவதற்குச் சிறிது காலத்துக்கு முன்னதாக, நாசரேத் புனித வீட்டை Angelos என்ற அரச குடும்பம், லொரேத்தோவுக்கு எடுத்து வந்ததாகவும் ஒரு மரபு உள்ளது. நாம் ஏற்கனவே சொன்னது போல, வான தூதர்கள் இந்தப் புனித வீட்டின் கற்களை இங்கு கொண்டு வந்தார்கள் என்ற நம்பிக்கையும் மக்கள் மத்தியில் இருக்கிறது. இயேசு மரியா வளன் இறந்த பிறகு இவர்கள் வாழ்ந்த வீட்டை திருத்தூதர்கள் ஆலயமாக மாற்றினார்கள் என்றும் சொல்லப்படுகிறது. லொரேத்தோ புனித வீட்டைச் சுற்றிக் கட்டப்பட்டுள்ள பிரமாண்டமான பசிலிக்கா 1469ம் ஆண்டில் கட்டப்பட்டது. இந்த லொரேத்தோ அன்னைமரியாவை, 1920ம் ஆண்டில் திருத்தந்தை 15ம் பெனடிக்ட், விமானப் பயணம் செய்பவர்கள் மற்றும் விமான ஓட்டிகளுக்குப் பாதுகாவலராக அறிவித்தார்.

முத்திப்பேறு பெற்ற திருத்தந்தை 23ம் அருளப்பர் இரண்டாம் வத்திக்கான் பொதுச்சங்கத்தை ஆரம்பிக்கும் முன்னர் இந்த லொரேத்தோ அன்னைமரியா திருத்தலத்துக்குத் திருப்பயணம் மேற்கொண்டார். இந்த நிகழ்வின் 50ம் ஆண்டு மற்றும் திருஅவையில் தொடங்கியுள்ள நம்பிக்கை ஆண்டையொட்டி 2012ம் ஆண்டு அக்டோபர் 4ம் தேதி திருத்தந்தை 16ம் பெனடிக்ட் லொரேத்தோ அன்னைமரியா திருத்தலத்துக்குத் திருப்பயணம் மேற்கொண்டு திருஅவையை அன்னைமரியாவிடம் அர்ப்பணித்தார். இந்த நம்பிக்கை ஆண்டில் விசுவாசத்துக்குச் சிறந்த எடுத்துக்காட்டாய் இருக்கும் அன்னைமரியாவின் வாழ்வை நாமும் பின்பற்றுவோம்.

 

Basilica of Divino Amore in Rome

Posted on February 8, 2020 at 2:25 AM

அன்னைமரியா திருத்தலங்கள் – திவினோ அமோரே அன்னை மரியா திருத்தலம், உரோம், இத்தாலி


இத்தாலியில் நூற்றுக்கணக்கான அன்னைமரியா திருத்தலங்கள் உள்ளன. 1,500 திருத்தலங்கள் இருப்பதாக ஒரு குறிப்புச் சொல்லுகின்றது. திருத்தலம் என்று சொல்லும்போது அது அன்னைமரியாவின் காட்சியோடு அல்லது புதுமையோடு தொடர்புடையதாக இருக்கின்றது அல்லது அன்னைமரியா பக்தி, காலங்காலமாய் இடம்பெற்றுவரும் இடமாகவும் இருக்கின்றது. இந்தத் திருத்தலங்கள், மக்கள் அடிக்கடி விரும்பித் திருப்பயணம் மேற்கொள்ளும் இடங்களாகவும் அமைந்துள்ளன. உலகில் அமைந்துள்ள புகழ்பெற்ற அன்னைமரியா திருத்தலங்களின் வரலாற்றைப் பார்த்தோமென்றால், அவ்விடங்களில் இளஞ்சிறாருக்கு அல்லது ஏழை எளிய மக்களுக்கு அன்னைமரியா காட்சி கொடுத்த நிகழ்வுகள் பதிவு செய்யப்பட்டிருக்கின்றன. எடுத்துக்காட்டாக, 1531ம் ஆண்டில் மெக்சிகோ நாட்டு குவதலூப்பேயில் (Guadalupe) ஹூவான் தியேகோவுக்கும், 1858ம் ஆண்டில் பிரான்ஸ் நாட்டு லூர்து நகரில் பெர்னதெத் சுபிரியோவுக்கும் (Bernadette Soubirous), தமிழகத்தின் வேளாங்கண்ணியில் 16ம் நூற்றாண்டில் பால்காரச் சிறுவனுக்கும் அன்னைமரியா காட்சி கொடுத்த நிகழ்வுகள் அதிகாரப்பூர்வமாகப் பதிவு செய்யப்பட்டிருக்கின்றன. ஜெர்மனியின் Altötting அருளின் அன்னை சிற்றாலயத்திலுள்ள கறுப்பு அன்னைமரி திருவுருவத்தை ஆண்டுதோறும் பத்து இலட்சத்துக்கு மேற்பட்ட மக்கள் தரிசித்து வருகின்றனர். இங்கு 500க்கு மேற்பட்ட ஆண்டுகளாகப் புதுமைகளும் இடம்பெற்றுவருகின்றன. இவ்வாண்டு பிப்ரவரி 11ம் தேதியன்று அனைத்துலக நோயாளர் தினத்தையும் கத்தோலிக்கத் திருஅவை சிறப்பிக்கவுள்ளது. உரோமையிலுள்ள திவினோ அமோரே என்ற இறையன்பு அன்னைமரித் திருத்தலத்தையும் ஒவ்வொரு நாளும் எத்தனையோ பக்தர்கள் தரிசித்து வருகின்றனர். இந்தத் திவினோ அமோரே அன்னைமரித் திருத்தல வரலாறு 13ம் நூற்றாண்டோடு தொடர்புடையது.

உரோமைக்கு ஏறக்குறைய 15 கிலோ மீட்டரில் இருக்கின்ற திவினோ அமோரே என்ற அன்னைமரியாத் திருத்தலம் அமைந்துள்ள இடம் அக்காலத்தில் விவசாய நிலமாகவும், புல்பூண்டுகள் நிறைந்த காட்டுப் பகுதியாகவும் இருந்தது. அவ்விடத்தில் சவெல்லி-ஓர்சினி(Savelli-Orsini) குடும்பத்தினருக்குச் சொந்தமான ஒரு கோட்டை(fortress) இருந்தது. அந்தக் கோட்டைக்கு லேவா (Leva) கோட்டை என்று பெயர். அந்தக் கோட்டையின் ஒரு கோபுரத்தில் அன்னைமரியாவின் திருவுருவப் படம் வைக்கப்பட்டிருந்தது. அன்னைமரி அரியணையில் அமர்ந்திருப்பது போலவும், அவரது கரங்களில் குழந்தை இயேசுவைத் தாங்கி இருப்பது போலவும், தூய ஆவியின் அடையாளமாக, ஒரு மாடப்புறா அன்னைமரியா மீது இறங்குவது போலவும் அந்தப் படம் வரையப்பட்டிருந்தது. இந்தப் படம் அந்தப் பகுதி இடையர்களால் அதிகம் வணங்கப்பட்டு வந்தது. 1740ம் ஆண்டின் வசந்த காலத்தில் அவ்வழியாக உரோமைக்குச் சென்ற வழிப்போக்கர் ஒருவர் அவ்விடத்தில் ஓநாய்கள் கூட்டத்தால் கடுமையாய்த் தாக்கப்பட்டார். அவை அந்த ஆளைக் கொன்று போடும் அளவுக்குத் தாக்கின. ஆதரவின்றித் தனியாய்த் தவித்த அந்த வழிப்போக்கர் அவ்விடத்தில் அன்னைமரியாவின் திருவுருவப் படத்தை ஏறெடுத்துப் பார்த்தார். இறைவனின் தாயே எனக்கு உதவி செய்யும் என அழுது மன்றாடினார். உடனடியாக அந்த ஓநாய்கள் அமைதியாகி காட்டுப் பகுதிக்குச் சென்றுவிட்டன. இந்த அற்புத நிகழ்வுக்குப் பின்னர், அவ்வாண்டு செப்டம்பர் 5ம் தேதியன்று அப்படம் அந்தக் கோபுரத்திலிருந்து எடுக்கப்பட்டு, அதற்கு அருகிலிருந்த “லா ஃபல்கோனியானா” (La Falconiana) என்ற பெரிய தோட்டத்திலிருந்த அன்னைமரியா சிற்றாலயத்துக்கு மாற்றப்பட்டது. பின்னர், ஐந்து ஆண்டுகள் கழித்து, அதாவது 1745ம் ஆண்டு ஏப்ரலில் அந்தத் திருவுருவப் படம் முன்பு இருந்த இடத்துக்கே மீண்டும் கொண்டு செல்லப்பட்டது. அவ்விடத்தில் ஆலயம் ஒன்றும் கட்டப்பட்டது. அதனை, கர்தினால் கார்லோ ரெசோனிக்கோ(Carlo Rezzonico) திருநிலைப்படுத்தினார். இவர்தான் பிற்காலத்தில் திருத்தந்தை 13ம் கிளமெண்ட்டாக, திருஅவையை வழிநடத்தினார்.

இதற்குப் பின்னர் திவினோ அமோரே அன்னைமரியாத் திருத்தலத்துக்கு மக்கள் திருப்பயணமாகச் செல்லத் தொடங்கினர். இது இன்றுவரைத் தொடர்ந்து நடைபெற்று வருகிறது. ஒவ்வோர் ஆண்டும் புனித சனிக்கிழமை தொடங்கி அக்டோபர்வரை ஒவ்வொரு சனிக்கிழமையும் ஆயிரக்கணக்கான மக்கள் இரவில் உரோமையிலிருந்து ஏறக்குறைய 15 கிலோ மீட்டர் தூரம் எரியும் மெழுகுதிரிகளுடன் செபங்களைச் செபித்துக்கொண்டு திரியாத்திரையாக நடந்தே அத்திருத்தலம் செல்கின்றனர். நிறம், இனம், மொழி, நாடு, மதம், என்ற வேறுபாடின்றி எல்லா மக்களும் இதில் பங்கெடுக்கின்றனர். இந்த திவினோ அமோரே அன்னைமரியாவின் திருவுருவப் படத்திற்கு 1883ம் ஆண்டு மே 13ம் தேதி வத்திக்கான் கிரீடம் சூட்டியது. 1932ம் ஆண்டு இந்தத் திருத்தலம் பங்குத்தளமானது.

இரண்டாம் உலகப்போர் சமயத்தில் ஒரு புதுமையும் இடம்பெற்றுள்ளது. 1944ம் ஆண்டு சனவரி 24ம் தேதியன்று உரோம் அழியக்கூடிய கடும் ஆபத்தை எதிர்நோக்கியது. அச்சமயத்தில் திவினோ அமோரே அன்னைமரியாத் திருவுருவப் படத்தை உரோமைக்குக் கொண்டு வந்து பல பங்கு ஆலயங்களுக்கு எடுத்துச் சென்றனர். இந்த ஆலயங்களில் கடைசியாக, இயேசு சபையினரின் புனித இஞ்ஞாசியார் ஆலயத்துக்கு எடுத்துச் செல்லப்பட்டது. அது 1944ம் ஆண்டு ஜூன் 4ம் தேதியாகும். தங்கள் வாழ்வைப் பதுப்பிப்பதாகவும், புதிய திருத்தலம் ஒன்றைக் கட்டுவதாகவும், பிறரன்புப் பணிகளில் ஈடுபடுவதாகவும் அன்று உரோம் மக்கள் அன்னைமரியாவுக்கு ஓர் உறுதிமொழி கொடுத்தனர். உரோமையும் அற்புதமாகக் காப்பாற்றப்பட்டது. 1944ம் ஆண்டு ஜூன் 11ம் தேதியன்று திருத்தந்தை 12ம் பத்திநாதர் இந்தத் திருத்தலத்திற்குச் சென்று மக்களோடு சேர்ந்து செபித்தார். திவினோ அமோரே அன்னைமரியா உரோம் நகரப் பாதுகாவலி என்றும் அறிவித்தார்.

இரண்டாம் உலகப்போருக்குப் பின்னர் இத்திருத்தலத்தின் கதவுகள் மீண்டும் திறக்கப்பட்டன. பிறரன்புப் பணிகளும் நடந்தன. 1979ம் ஆண்டு மே முதல் தேதி முத்திப்பேறு பெற்ற திருத்தந்தை 2ம் ஜான்பால் இத்திருத்தலம் சென்று, அதனை உரோமின் அன்னைமரியா திருத்தலம் என்று அறிவித்தார். மரியா ஆண்டு தொடக்கத்தையொட்டி 1987ம் ஆண்டு ஜூன் 7ம் தேதியன்று மீண்டும் திருத்தந்தை 2ம் ஜான்பால் இத்திருத்தலம் சென்றார். 1999ம் ஆண்டில் புதிய திருத்தலம் கட்டப்பட்டது. அன்பர்களே, குழந்தை வரம் கேட்டவருக்குக் குழந்தைப் பேறு கிடைத்திருக்கிறது. குழந்தை வரம் கேட்ட கிறிஸ்தவரல்லாத ஒரு பஞ்சாப் தம்பதியர் இருவருக்கு குழந்தைப் பேறு கிடைத்ததை அவர்களே சொல்லக் கேட்டிருக்கிறேன். இப்படிப் பல புதுமைகள். திவினோ அமோரே அன்னைமரியாத் திருத்தலத்தில் பக்தர்கள் நன்றியாக செலுத்திய காணிக்கைப் பொருள்களைப் பார்த்தாலே இந்தத் தாயின் அருமை பெருமை நமக்குப் புரியும். இறைவனின் தாயாம் மரியிடம் நம்பிக்கையோடு அண்டிச் சென்றவர்கள் யாரும் வெறுங்கையோடு திரும்பியதில்லை.

 

Basilica of Caravaggio in Italy

Posted on February 8, 2020 at 2:20 AM

அன்னைமரியா திருத்தலங்கள் – கரவாஜ்ஜோ அன்னைமரி, இத்தாலி


கரவாஜ்ஜோ அன்னைமரி திருத்தல வரலாறு 15ம் நூற்றாண்டின் முதல் பாதி பகுதியிலிருந்து ஆரம்பமாகின்றது. கரவாஜ்ஜோ நகரம், வட இத்தாலியின் லொம்பார்தியா மாநிலத்தில், பெர்கமோ மாவட்டத்திலுள்ளது. இது மிலானுக்கு கிழக்கே, 40 கிலோ மீட்டர் தூரத்திலுள்ளது. இந்தக் கரவாஜ்ஜோவில் ஒரு விவசாயக் குடும்பத்தில் பிறந்தவர் ஜோவனெத்தா வரோலி. இந்தப் பக்தியுள்ள இளம்பெண் ஓர் அருள்சகோதரியாக துறவு வாழ்வைத் தெரிந்தெடுக்க விரும்பினார். ஆனால் அவரது தந்தை பியத்ரோ வாக்கி என்பவர், தனது மகளுக்குத் திருமணம் செய்து அழகு பார்க்க விரும்பினார். ஜோவனெத்தாவும் தனது தந்தையை மகிழ்ச்சிப்படுத்த விரும்பி பிரான்செஸ்கோ வரோலி என்ற விவசாயியை மணந்தார். ஆனால் ஜோவனெத்தாவின் தந்தை நினைத்ததுபோல் அவரது திருமண வாழ்வு மகிழ்ச்சியாக அமையவில்லை. பிரான்செஸ்கோ நல்ல மனிதராக வாழவில்லை. தனது மனைவியின் வாழ்வைத் துன்பமயமாக்கினார். அது 1432ம் ஆண்டு மே 26ம் தேதி. அன்று ஜோவனெத்தாவுக்கு உடம்பு நன்றாக இல்லை. அப்படியிருந்தும், மாடுகளுக்குப் புல்வெட்டி வருமாறு அவரை வயற்காட்டுக்கு அனுப்பினார் அவரது கணவர் பிரான்செஸ்கோ. அன்று நிறைய புல்களை வெட்டி பெரிய கட்டாக கட்டிய பின்னர் சிறிது நேரம் ஓய்வெடுத்துக் கொண்டிருந்தார் ஜோவனெத்தா. ஒருவேளை ஜோவனெத்தா களைப்பினால் கண் அயர்ந்து தூங்கியிருக்க வேண்டும்.

திடீரென ஜோவனெத்தா நிமிர்ந்து பார்த்தபோது, புனித கன்னிமரியா அவர்முன் நிற்பதைக் கண்டார். அப்போது அன்னைமரியா ஜோவனெத்தாவிடம், நல்ல இதயம் கொண்டிரு. உனது கஷ்டங்கள் விரைவில் மறைந்து போகும். இயேசு, மக்களின் பாவங்களால் வருத்தமடைந்துள்ளார். மக்கள் மனம்வருந்தி தங்களது வழிகளைத் திருத்திக் கொண்டால், ஜோவனெத்தா அவர்களுக்காக கிறிஸ்துவின் இரக்கத்தைப் பெற்றுக் கொடுக்கலாம். இல்லாவிட்டால் கிறிஸ்து அவர்களைத் தண்டிப்பார். இவ்வாறு எச்சரித்த அன்னைமரியா ஜோவனெத்தாவிடம், இந்த இடத்தில் தனது பெயரில் ஓர் ஆலயம் கட்டுமாறும் கேட்டுக்கொண்டார். தனது விருப்பங்களை மக்களுக்குச் சொல்லுமாறும் கூறினார். மக்கள் தனது விருப்பத்தின்படி நடந்து கொண்டால் அவர்களைப் பல வரங்களால் ஆசீர்வதித்து புதுமைகளையும் செய்வேன் என்று சொல்லி மறைந்தார் அன்னைமரியா. ஆயினும் அன்னைமரியா அந்த இடத்தில் காட்சி கொடுத்ததன் அடையாளமாக, அவர் அந்த இடத்தில் நின்றுகொண்டிருந்த பாறையின்மீது, தனது பாதங்களின் அடையாளங்களை விட்டுச் சென்றார். ஆம். அந்தக் கல்லின்மீது அன்னைமரியாவின் பாதப் பதிவுகள் இருந்தன. அதோடு, அந்தப் பாறைக்கடியிலிருந்து சுத்தமான தண்ணீரும் பீறிட்டு அடித்தது.

ஜோவனெத்தா கரவாஜ்ஜோவுக்கு விரைந்து சென்று தான் கண்ட காட்சி பற்றி ஊர் மக்களிடம் விவரித்தார். அன்னைமரியா தனக்குச் சொன்னவைகளையும் எடுத்துச் சொன்னார். ஆனால் ஜோவனெத்தாவின் சொற்களைச் சிலரே நம்பினர். ஜோவனெத்தா கதை கட்டுகிறார் என்று கேலி செய்து அவரைக் கிண்டலடித்தனர். சிறிது நேரம் கழித்து, சிலர் அந்த இடத்துக்குச் சென்று, அந்தப் பாறைக்கடியிலிருந்து ஊற்றெடுத்து ஓடிக்கொண்டிருந்த சுத்தமான தண்ணீரில் குளித்தனர். அவர்களுக்கிருந்த உடல் வலியும் மற்ற நோய்களும் மாயமாய் மறைந்து போயின. இவர்களைப் பின்தொடர்ந்து மற்ற மக்களும் அவ்வாறே செய்தனர். அவர்களும் அந்த நீரில் அற்புதம் நடப்பதை அனுபவித்தனர். அதன் பின்னர் ஜோவனெத்தாவின் காட்சியையும், அக்காட்சியில் அவர் கேட்ட அன்னைமரியாவின் வார்த்தைகளையும் நம்பத் தொடங்கினர். அந்தச் செய்தி சுற்றுப்புறமெங்கும் பரவத் தொடங்கியது. மிலான் நகரக் கோமகன் Filberto Marie Viscontiயின் உதவியுடன் மக்கள் அவ்விடத்தில் திருத்தலம் ஒன்றைக் கட்டினார்கள். மக்கள் கூட்டம் அவ்விடத்துக்கு அதிகமாக வருவதைக் கண்ட அப்போதைய மிலான் பேராயராக இருந்த புனித சார்லஸ் பொரோமியோ, 1575ம் ஆண்டில் பெல்லெகிரினியோ பெல்லெகிரினி(Pellegrino Pellegrini) என்ற கட்டிடக் கலைஞரின் உதவியால் அந்தத் திருத்தலத்தைப் பெரிதாகக் கட்டினார். இதற்குப் பின்னர் சில சீர்திருத்தங்களும் இதில் செய்யப்பட்டன. இதுவே தற்போது வெகு அழகாக புகழுடன் விளங்கும் கரவாஜ்ஜோ அன்னைமரியா திருத்தலம் ஆகும்.

இன்றும் ஆயிரக்கணக்கானத் திருப்பயணிகள் அங்குச் சென்று அன்னைமரியாவின் அருள்வரங்களைப் பெற்று மகிழ்கின்றனர். கரவாஜ்ஜோ அன்னைமரி விழா, அன்னைமரியா காட்சி கொடுத்த மே 26ம் தேதி சிறப்பிக்கப்படுகிறது. அந்த நவநாள் காலங்களில் மக்கள், சிறப்பாக, வட இத்தாலியிலுள்ள மக்கள் திருப்பயணமாகச் சென்று வருகின்றனர். அன்னைமரியா, ஜோவனெத்தாவை ஆசீர்வதிப்பதுபோல் உள்ள திருவுருவம் விரிவுபடுத்தப்பட்ட இத்திருத்தலத்தில், அதுவும், அன்னைமரியா காட்சி கொடுத்த அதே இடத்தில் வைக்கப்பட்டுள்ளது. அன்னைமரியாவின் பாதத்துக்குக் கீழேயிருந்து சிறிய தண்ணீர் ஓடை இன்றும் ஓடுகிறது.

துன்பப்பட்டுக் கொண்டிருந்த ஜோவனெத்தா குடும்பத்தில் அமைதி நிலவும் என்றும், அச்சமயத்தில் சண்டையிட்டுக் கொண்டிருந்த அண்டை மாநிலங்களின் மக்கள் மத்தியில் ஒப்புரவு ஏற்படும் என்றும், 1436ம் ஆண்டு முதல் 1445ம் ஆண்டுவரை நடைபெற்ற பிளாரன்ஸ் பொதுச்சங்கம் மூலம் கிழக்கு மற்றும் மேலைத் திருஅவைகளுக்கு இடையே ஒப்புரவு ஏற்படும் என்றும் அன்னைமரியா ஜோவனெத்தாவுக்குக் காட்சி கொடுத்தபோது கூறினார்.

இன்று அதிகம் தேவைப்படுவது ஒப்புரவு. தனிமனிதர் வாழ்விலும் சரி, குடும்பங்களிலும், சமூகங்களிலும், நாடுகளிலும், நாடுகளுக்கு இடையேயும் சரி, இன்று ஒப்புரவு அதிகம் தேவைப்படுகிறது. புனித பவுல் மனந்திரும்பிய விழாவான வருகிற வெள்ளிக்கிழமையன்று கிறிஸ்தவ ஒன்றிப்புச் செப வாரம் நிறைவடைகின்றது. நூற்றாண்டுகளாகப் பிளவுபட்டு இருக்கும் கிறிஸ்தவ சபைகள் தங்களுக்குள் ஒப்புரவாகி, ஒன்றிணைந்து கிறிஸ்துவுக்குச் சாட்சி சொல்ல வேண்டுமென்பதே அனைவரின் ஆவல். திருத்தந்தை 16ம் பெனடிக்ட் அவர்களும் கடந்த ஞாயிறன்று இந்த ஒன்றிப்பை வலியுறுத்தினார். தனிமனிதர்கள் தங்களுக்குள்ளே ஒப்புரவாகி ஓர் இணக்கமான வாழ்வு வாழ வேண்டியிருக்கிறது. ஒவ்வொருவரும் தன்னை மன்னித்து தனக்குள் சமாதானமாக வாழ வேண்டும். அப்போதுதான் அவர் மற்றவர்களோடு சமாதானமாய் வாழ்வார். அப்போதுதான் அவர் வாழும் குடும்பமும், சமுதாயமும் சமாதானமாய், ஒப்புரவுடன் வாழும். அத்தகைய இடத்தில் அன்பும் மகிழ்ச்சியும் இருக்கும். இவ்வேளையில் அமைதிக்காவும், ஒப்புரவுக்காகவும் ஏங்கும் மத்திய கிழக்கு நாடுகளை, குறிப்பாக சிரியா நாட்டை, பாலஸ்தீனத்தை, போரிடும் நாடுகளை, எல்லைப் பகுதியில் பதட்டம் நிலவும் இந்தியா, பாகிஸ்தானை நினைத்து கரவாஜ்ஜோ அன்னைமரியிடம் செபிப்போம். தாயே, அம்மா, எங்களுக்கு அமைதியையும் சமாதானத்தையும் அருளும். சபைகளுக்குள், குடும்பங்களுக்குள் ஒற்றுமையைத் தாரும்.

 

Basilica of Montichiari Rosa Mystica in Italy

Posted on February 8, 2020 at 2:20 AM

அன்னைமரியா திருத்தலங்கள் – Montichiari ரோசா அன்னைமரியா


இயேசுவின் தாயும், திருஅவையின் தாயுமாக இருக்கும் அன்னைமரியா, மறையுண்மைகளைத் தாங்கிய ஒரு ரோசா மலரோடு ஒப்புமைப்படுத்தப்படுகிறார். பண்டைக்காலத்தில் ரோசா மலர், புதிரான ஒன்றின் அடையாளமாகக் கருதப்பட்டது. தொடக்ககாலக் கிறிஸ்தவர்கள் இந்த ரோசாவை உயிர்த்தியாகத்துக்கும்(சிப்ரியான் மறைசாட்சியத்துக்கும்) விண்ணுலகுக்கும்(புனித கலிஸ்துஸ்) உருவகமாகப் பயன்படுத்தி வந்தனர். விவிலியத்தின் சீராக் புத்தகத்தில், “பற்றுறுதியுள்ள மக்களே, நீரோடை அருகில் வளரும் ரோசாவைப்போன்று மலர்ந்து விரியுங்கள்”(சீராக்39,13)என்றும், “ஞானத்தின் புகழ்ச்சி பற்றிச் சொல்லும்போது, எங்கேதி ஊரின் பேரீச்சமரம் போலவும், எரிகோவின் ரோசாச்செடி போலவும்... நான் ஓங்கி வளர்ந்தேன்” (சீராக்24,14) என்றும், “தலைமைக் குரு சீமோன், முதற்கனிகளின் காலத்தில் மலரும் ரோசா போன்றும் திகழ்ந்தார்”(சீராக்50,08) என்றும், சொல்லப்பட்டுள்ளது. இங்கு சொல்லப்படும் பற்றுறுதியுள்ள இறைமக்கள், ஞானம், சீமோன் ஆகிய மூன்றும், அன்னைமரியாவின் பாவமில்லாதன்மையையும், இயேசுவின் பிறப்பில் அவரது பங்கேற்பையும் உயர்த்திக் காட்டுவதற்குப் பயன்படுத்தப்பட்டுள்ளன. மரியா கன்னியாக இருந்து தாய்மைப்பேறு அடைந்ததே அவரது மறைபொருளான வாழ்வாகும்.

இவ்வாறு ரோசா மலர் அன்னைமரியாவின் வாழ்வோடு நெருங்கிய தொடர்பைக் கொண்டிருக்கிறது. இது குறித்து கடந்த வார நிகழ்ச்சியிலும் பார்த்தோம். இத்தாலியின் Montichiari Rosa Mystica அன்னைமரியா திருத்தலம், பியெரினா ஜிலி என்பவரோடு தொடர்புடையது. Montichiariல் வாழ்ந்த பியெரினா ஜிலி(Pierina Gilli) என்பவர் வாழ்விலும் ரோசா அன்னைமரியா தலைப்பட்டுள்ளார். Montichiari, வட இத்தாலியில், Brescia நகருக்கு 20 கிலோ மீட்டர் தொலைவிலுள்ள ஒரு சிறிய நகரமாகும். இந்நகரம், Po நதி பாயும் வளமான சமவெளிப் பகுதியில் இத்தாலிய ஆல்ப்ஸ் மலைகளுக்கு முன்பக்கத்தில் அமைந்துள்ளது. இந்தச் சிறிய நகரத்தில் 1911ம் ஆண்டு ஆகஸ்ட் 3ம் தேதி ஓர் ஏழை விவசாயக் குடும்பத்தில் பிறந்த பியெரினா, அந்நகரத்திலிருந்த மருத்துவமனையில் தாதியாக வேலை செய்து வந்தார். பியெரினாவுக்கு அன்னைமரியா, 1947ம் ஆண்டிலிருந்து 1966ம் ஆண்டுவரை எட்டு தடவைகள் காட்சி கொடுத்திருக்கிறார். 1947ம் ஆண்டின் வசந்த காலத்தின் ஒருநாளில் Montichiari மருத்துவமனையிலுள்ள சிற்றாலயத்தில் பியெரினா செபித்துக் கொண்டிருந்தபோது அன்னைமரியா தோன்றினார். கண்களைக் கூசவைக்கும் ஒளிக்கு மத்தியில், இலேசான நீலநிற உடையுடன் கண்களில் கண்ணீர் மல்க மிகவும் சோகமாகத் தோன்றினார் அன்னைமரியா. அப்போது அன்னைமரியாவின் இதயம், மூன்று வாள்களால் ஊடுருவப்பட்டிருந்தது.

முதல் வாள், குருக்கள் தகுதியில்லாமல் திருப்பலி நிகழ்த்துவதையும், திருநற்கருணை வாங்குவதையும், இரண்டாவது வாள், குருக்கள் தங்களது குருத்துவ மற்றும் துறவு வாழ்வுக்குப் பிரமாணிக்கமில்லாமல் இருந்து அவ்வழைப்பைக் கைவிட்டு விடுவதையும், மூன்றாவது வாள், அவர்கள் விசுவாசத்தை மறுதலிப்பதையும் குறிக்கின்றன. எனவே செபம், தியாகம், தபம் ஆகிய செயல்களை, பியெரினா வழியாக கேட்டுள்ளார் அன்னைமரியா. 1947ம் ஆண்டு ஜூன் 13ம் தேதி இரண்டாவது தடவையாக, பியெரினாவுக்குத் தோன்றிய அன்னைமரியா, வெள்ளை, சிவப்பு, மஞ்சள் ஆகிய மூன்று அழகான ரோசா மலர்களால் அலங்கரிக்கப்பட்ட வெண்ணிற ஆடையில் இருந்தார். இம்மூன்று மலர்களும், முதன்முறை காட்சியில் தோன்றிய அந்த மூன்று வாள்கள் இருந்த இடத்தில் இருந்தன. அதற்கு நல்லதொரு விளக்கமும் அளிக்கப்பட்டுள்ளது. வெள்ளை ரோசா செப உணர்வையும், சிவப்பு ரோசா தியாக உணர்வையும், மஞ்சள் ரோசா, தபம் மற்றும் மனமாற்ற உணர்வையும் குறிக்கின்றன.

பியெரினா தனக்குக் காட்சி கொடுக்கும் அந்த அழகான பெண் யாரென்று தெரியமால் இருந்தார். ஆதலால், இரண்டாவது காட்சியில் அவரிடம், தயவுசெய்து நீங்கள் யார் எனச் சொல்லுங்கள் எனக் கேட்டார். அப்போது அந்தப் பெண் புன்முறுவலுடன், “நான் இயேசுவின் தாய், உங்கள் அனைவருக்கும் தாய். அனைத்துத் துறவு சபைகளுக்கும் துறவு நிறுவனங்களுக்கும் இவ்வுலகின் குருக்கள் அனைவருக்கும் ஒரு புதிய அன்னைமரியா பக்தியை வழங்குவதற்காக நம் ஆண்டவர் என்னை உன்னிடம் அனுப்பியிருக்கிறார். எனக்கு இந்தச் சிறப்பான வழியில் பக்தி முயற்சிகளைச் செய்யும் துறவு சபைகளுக்கும் துறவற நிறுவனங்களுக்கும் பாதுகாப்பு அளிப்பேன், இறையழைத்தல்கள் அதிகரிக்கச் செய்வேன், இறைமக்கள் மத்தியில் தூய வாழ்வுக்கானத் தேடல் நிறைவுறச் செய்வேன். ஒவ்வொரு மாதத்தின் 13ம் தேதியன்று மரியா நாளைச் சிறப்பிக்க வேண்டுமென விரும்புகிறேன். அதற்கு முந்தைய 12 நாள்களும் சிறப்புச் செபங்கள் சொல்ல வேண்டும். அவ்வாறு செய்யும் துறவு சபைகளுக்கும் துறவற நிறுவனங்களுக்கும் நிறைய அருளைப் பொழிவேன்” என்று சொன்னார்.

அப்போது பியெரினா ஏதாவது புதுமை நடக்குமா என்று அன்னைமரியாவிடம் கேட்டார். அதற்கு அன்னைமரியா, நீண்டகாலமாகத் தங்கள் அழைத்தலுக்குப் பிரமாணிக்கமின்றி வாழ்ந்து வரும் துறவிகள் தண்டனைகளையும், அடக்குமுறைகளையும் எதிர்நோக்குவார்கள் என்று கூறினார். இந்தக் காட்சி பற்றி விவரித்த பியெரினா, மரியா, மறைபொருளான, அகவாழ்வின் ஆசிரியர், கிறிஸ்துவின் மறையுடலின் தாய், அதாவது திருஅவையின் தாய் என்று சொன்னார். பியெரினாவின் இந்த விளக்கத்தை, திருத்தந்தை ஆறாம் பவுல், 1964ம் ஆண்டு நவம்பர் 21ம் தேதி உறுதி செய்தார். மரியா, திருஅவையின் தாய் என்று அறிவித்தார்.

மீண்டும் அன்னைமரியா, Montichiari மருத்துவமனையிலுள்ள சிற்றாலயத்தில் 1947ம் ஆண்டு அக்டோபர் 22ம் தேதி பியெரினாவுக்குத் தோன்றினார். அச்சமயம் மருத்துவர்கள், பல பணியாளர்கள் மற்றும் மக்களும் கூடியிருந்தனர். அக்காட்சியின்போது அன்னைமரியா தான் இயேசுவுக்கும், மனித சமுதாயத்துக்கும், சிறப்பாக, இறைவனுக்குத் தன்னை அர்ப்பணிக்கும் ஆன்மாவுக்கும் இடையே இடைநிலையாளராக இருப்பேன் என்று கூறினார். மீண்டும் இதே ஆண்டு நவம்பர் 16, நவம்பர் 22, டிசம்பர் 7,8 ஆகிய நாள்களிலும் அன்னைமரியா பியெரினாவுக்குத் தோன்றினார். இந்தக் கடைசிக் காட்சி பங்குக் கோவிலில் ஆயிரக்கணக்கான மக்கள் கூடியிருந்த போது இடம்பெற்றது. Montichiariல் அன்னைமரியா காட்சி கொடுத்தபோது, தான் 'Rosa Mystica' என்ற பெயரில் போற்றப்பட வேண்டுமெனத் தெரிவித்தார். இந்தக் காட்சிகளின்போது பல புதுமைகள் நடைபெற்றன. எழுந்து நிற்கவோ, நடக்கவோ முடியாமல் போலியோவினால் தாக்கப்பட்டிருந்த 6 வயதுச் சிறுவன், 12 ஆண்டுகளாக காச நோயால் கடுமையாய்ப் பாதிக்கப்பட்டு, 9 ஆண்டுகளாக ஒரு வார்த்தைகூடச் உச்சரிக்க முடியாமல் இருந்த 26 வயதுப் பெண், மனநலம் பாதிக்கப்பட்ட 36 வயதுப் பெண் போன்றோர் முழுமையாய்க் குணமடைந்தனர். இப்படி அங்கு நடந்த பல புதுமைகளைச் சொல்லலாம். இத்திருத்தலங்களில் இன்றும் புதுமைகள் தொடர்ந்து இடம்பெற்று வருகின்றன.

Montichiariவுக்கு அருகிலுள்ள Fontanelle என்ற ஊரில், 1966ம் ஆண்டு, ஏப்ரல் 17, மே 13, ஜூன் 9, ஆகஸ்ட் 6, ஆகிய நாள்களிலும் அன்னைமரியா பியெரினாவுக்குத் தோன்றினார். இந்தக் காட்சிகளின்போதும் பியெரினா, அன்னைமரியாவை யார் என்றும், அவர் என்ன விரும்புகிறார் என்றும் கேட்டுள்ளார். அதற்கு அன்னைமரியா, தனது பிள்ளைகளுக்கு, அன்பு, ஐக்கியம் மற்றும் அமைதியைக் கொண்டு வந்துள்ளேன். தனது பிள்ளைகள் பிறரன்புச் சேவைகள் செய்ய வேண்டுமென்று கேட்டுக் கொண்டார்.

Montichiari, Fontanelle ஆகிய இடங்களிலுள்ள திருத்தலங்களுக்கு ஆண்டுதோறும் பக்தர்கள் சென்று அன்னைமரியாவிடம் அருள்வரங்களைப் பெற்று வருகின்றனர். தனது பிள்ளைகளின் நிலைமையை, தாயின்றி வேறு யார் நன்றாக அறிந்திருக்க முடியும்?

 

Basilica of the Holy Rosary in italy

Posted on February 8, 2020 at 2:20 AM

அன்னைமரியா திருத்தலங்கள் – இத்தாலியின் லூக்கா நகர் ரோசா அன்னைமரியா


எத்தனை வகை மலர்களைப் பார்த்தாலும் ரோசாவைக் கண்டவுடன் அது அத்தனை பேரின் மனதையும் கொள்ளை கொண்டு விடுகின்றது. அதன் அழகும், மணமும், பல வண்ணங்களும் அனைவரையும் கவர்ந்திழுக்கின்றன. ஞானத்தின் புகழ்ச்சி பற்றிச் சொல்லும் சீராக் புத்தகம் 24,14ல் “எங்கேதி ஊரின் பேரீச்சமரம் போலவும், எரிகோவின் ரோசாச் செடி போலவும்” என்று குறிப்பிடுகிறது. நூற்றுக்கும் மேற்பட்ட வகைகளைக் கொண்ட ரோசா மலர், அன்னைமரியாவுக்கு விருப்பமான மலராக இருப்பதை வரலாற்றைப் படித்துப் பார்க்கும்போது தெரிய வருகிறது. மெக்சிகோ நாட்டு Guadeloupeல் 1531ம் ஆண்டு டிசம்பரில் அன்னை மரியா, 57 வயதான Juan Diegoவுக்குக் காட்சி கொடுத்தபோது, தனது காட்சி உண்மையானது என்பதைக் காட்டுவதற்கு ரோசா மலர்களையே பயன்படுத்தினார். ரோசா மலர்கள் பூக்காத குளிர் காலத்தில் Juan Diegoன் மேல் போர்வையில் அழகான ரோசாக்களை நிரப்பினார் அன்னைமரியா. அதோடு, அந்தப் போர்வையில் அவற்றை அழகாக வரிசைப் படுத்தியிருந்தார் அன்னை மரியா. பிரான்ஸ் நாட்டு La Saletteல் அன்னைமரியா தனது காட்சியில் ரோசா மலர்களாலான மூன்று மாலைகளை அணிந்திருந்தார். அவரது காலணிகளின் விளிம்புகளிலும் சிறிய ரோசா மலர்கள் இருந்தன. அதேபோல் அன்னைமரியா காட்சி கொடுத்த Lourdes, Pontmain, Pellevoisin, Beauraing,, Banneaux போன்ற இடங்களிலும் அவர் அழகான ரோசாக்களைக் கொண்டு வந்திருந்தார். Josefa Menendez என்ற அருள்சகோதரிக்கு, அன்னைமரியா தனது பாவமாசற்ற அமல இதயத்தைக் காட்டியபோது அந்த இதயம் சிறிய வெள்ளை ரோசாக்களால் சூழ்ந்திருந்தது. எனவே அன்னைமரியாவை ரோசா அன்னை என நாம் அழைக்கலாம்.

அதோடு, அன்னைமரியாவின் திருமண ஆடை, “நீலம், வெள்ளை, வைலட், பொன் ஆகிய நிறங்களாலான ரோசாக்களால் மிக அழகாக நெய்யப்பட்டிருந்தது” என்றும், கபிரியேல் வானதூதர் அன்னைமரியாவுக்கு இயேசு பிறப்பை அறிவித்த பின்னர், அந்தத் தூதர் அவ்விடத்திலிருந்து மறைந்து சென்ற பாதையில், பாதி மலர்ந்த ரோசா மலர்கள் அன்னைமரியா மீது பொழியப்பட்டதாகவும் பாரம்பரியமாகச் சொல்லப்பட்டு வருகிறது. அன்னைமரியாவுக்கு மிகவும் பழக்கப்பட்ட தமாஸ்கு நகரில் நூற்றுக்கணக்கான ஆண்களும் பெண்களும் ரோசா மலர் தொழில் செய்து வாழ்க்கை நடத்துகின்றனர். இந்த மலர்களிலிருந்தே அத்தார் நறுமணத்திரவியமும், ரோஸ்வாட்டரும் தயாரிக்கப்படுகின்றன. இந்த நகர மக்கள் எங்கு சென்றாலும் தங்களுடன் ரோசா நறுமணத் தைலத்தையும் எடுத்துச் செல்கின்றனர். எனவே நாமும் ரோசா அன்னைமரியாவின் நற்பண்புகளை அணிந்திருந்தால் நாம் செல்லுமிடமெல்லாம் நறுமணத்தைத் தாங்கிச் சென்று, ரோசா அன்னைமரியா வழியாக கடவுளிடம் மற்ற ஆன்மாக்களை அழைத்துச் செல்லலாம். பழைய இலத்தீன் நாள் குறிப்பேட்டில் குறிப்பிடப்பட்டுள்ள பல அன்னைமரியா திருவிழாக்களில் “ரோசா அன்னைமரியா விழாவும்” ஒன்று. இத்திருவிழா, இத்தாலியின் Lucca நகரில் சனவரி 30ம் தேதி சிறப்பிக்கப்படுகிறது. அந்நகர் புனிதர்கள் பேதுரு பவுல் ஆலயத்திலுள்ள அன்னைமரியா திருவுருவத்தின் தோள்களில் சனவரியில் மூன்று ரோசா மலர்கள் இருந்தது கண்டுபிடிக்கப்பட்டுள்ளது. எனவே 'Rosa Mystica' என்றும் அன்னைமரியா அழைக்கப்படுகிறார்.

அன்னைமரியா குறித்து எழுதிய புனித Clairvauxன் Bernard, மனித சமுதாயத்தின் முதல் பெண்ணாகிய ஏவாள் ஒரு முள்ளாக இருந்து காயப்படுத்தி அனைவருக்கும் மரணத்தைக் கொண்டு வந்தார். ஆனால் மரியாவில் ரோசாவைப் பார்க்கிறோம். இது ஒவ்வொருவரின் புண்களையும் இதமாகத் தடவிக் கொடுத்து குணமாக்கி மீட்பை பெற்றுக் கொடுத்தது. மரியா, ரோசா மலராக இருந்தார். வெள்ளை ரோசா, கன்னிமைக்கும், சிவப்பு ரோசா, அன்புக்கும் அடையாளங்கள். வெள்ளை, அன்னைமரியாவின் உடலிலும், சிவப்பு அவரது ஆன்மாவிலும் இருக்கின்றன. வெள்ளை, நற்பண்புகளைத் தேடுவதையும், சிவப்பு, தீயவைகளை அழிப்பதையும் குறிக்கின்றன என்று சொல்கிறார் புனித பெர்னார்டு.

சோதனைப் புயல்கள் வீசுகின்றனவா, துன்பப்படுகுழியில் கஷ்டப்படுகிறீர்களா, அன்னைமரியாவை உற்று நோக்கி அவரை அழையுங்கள். தற்பெருமை, பொறாமை, பழித்துக்கூறுதல் போன்ற காற்றால் அலைக்கழிக்கப்படுகின்றீர்களா, அன்னைமரியாவை உற்று நோக்கி அவரைக் கூப்பிடுங்கள். உடலின்பத்தால், கோபத்தால், பேராசையால் உங்கள் மனது அடித்துச் செல்லப்படுகின்றதா, அன்னைமரியாவை உற்று நோக்குங்கள். உங்கள் பாவங்களால் கஷ்டப்படுகிறீர்களா, உங்களது மனசாட்சியின் தீமைகளால் குழம்பிப் போயிருக்கிறீர்களா, இறந்த பின்னர் நடக்கும் நீதித்தீர்ப்புக்குப் பயந்து கொண்டிருக்கிறீர்களா, கவலையாக, சோகமாக இருக்கிறீர்களா, அன்னைமரியாவை நினைத்துப் பாருங்கள். ஆபத்தில், குழப்பத்தில், இடர்களில் அன்னைமரியாவை நினைத்து அவரை அழையுங்கள். அன்னைமரியாவின் பெயர் உங்கள் வாயிலும் இதயத்திலும் எப்போதும் இருக்கட்டும். அவரது உதவியைக் கேட்டு உதவிகளை நீங்கள் பெறலாம் அதேநேரம் அன்னைமரியா வாழ்ந்த விதத்தை முன்மாதிரிகையாய்க் கொள்ள எப்போதும் மறக்க வேண்டாம் என்றும் புனித பெர்னார்டு சொல்கிறார்.

நீங்கள் அன்னைமரியாவைப் பின்பற்றினால் நெறிதவறிப் போகமாட்டீர்கள். நீங்கள் அன்னைமரியாவிடம் செபித்தால், சோர்வடையமாட்டீர்கள். நீங்கள் அன்னைமரியாவை நினைத்தால் தொலைந்து போகமாட்டீர்கள். நீங்கள் அன்னைமரியாவைப் பற்றிக்கொண்டால் கீழே விழமாட்டீர்கள். அன்னைமரியா உங்களைப் பாதுகாத்தால் நீங்கள் பயப்படத் தேவையில்லை. அவர் உங்களது வழிகாட்டியாக இருந்தால் நீங்கள் களைப்படையமாட்டீர்கள். அவர் உங்களுக்குச் சார்பாக இருந்தால் நீங்கள் உங்கள் இலக்கை அடைவீர்கள். நீங்களே உங்கள் வாழ்வில் அனுபவிப்பீர்கள்.

கர்தினால் Newman அன்னைமரியா பற்றி இவ்வாறு சொல்கிறார் - ஆன்மீக உலகில் மிக மிக அழகான மலராக இருப்பவர் அன்னைமரியா. கடவுளின் அருளால், தூய்மை, மகிமை ஆகிய அனைத்து மலர்களையும் அவர் வறண்ட நிலங்களில் பூக்கச் செய்கிறார். அனைத்து ஆன்மீக மலர்களுக்கும் இவரே அரசி. எனவே அன்னைமரியா ரோசா என அழைக்கப்படுகிறார். ஏனெனில் ரோசா மலர் அனைத்து மலர்களிலும் மிக அழகானது. எனினும் அவர் ஆடம்பரங்களை விரும்பாது மறைவாக வாழ்பவர் என்று.

அன்பு நேயர்களே, ரோசா அன்னை மரியா பற்றி இன்னும் சில புதுமைகள் இருக்கின்றன. அவை அடுத்த வாரத்தில் தொடரும்.... ரோசா அன்னைமரியாவிடம் செபிப்போம். ரோசா மலர் போன்று நாமும் நற்பண்புகளால், தூய்மையால், வாழ்க்கையில் நறுமணம் வீசுவோம். நம்மைச் சுற்றி வாழ்வோரையும் அந்த நறுமணத்தால் நிரப்புவோம்.

 


Rss_feed